इन्फा अवार्ड–२०२६ को तयारी तीव्र, बेलायतको आयोजक टोली काठमाडौं आइपुग्यो

काठमाडौं– आगामी अगस्ट १५ (साउन ३० गते) काठमाडौंमा आयोजना हुने तेस्रो संस्करणको अन्तर्राष्ट्रिय नेपाली फिल्म अवार्ड (इन्फा अवार्ड–२०२६) को तयारी अन्तिम चरणमा पुगेको छ । अवार्ड समारोहलाई सफल बनाउन बेलायतस्थित आयोजक टोली इन्फा ईभेन्ट्स युकेको टोली बूधवार साँझ काठमाडौं आइपुगेको छ । काठमाडौं विमानस्थलमा आयोजक टोलीलाई इन्फा नेपालका पदाधिकारी तथा सदस्यहरूले आत्मीय स्वागत गरेका छन् । टोलीको आगमनसँगै अवार्ड समारोहको तयारीले थप तीव्रता पाएको आयोजकले जनाएको छ । बेलायतबाट काठमाडौं आइपुगेको इन्फा अन्तर्राष्ट्रिय टोलीमा अध्यक्ष उमेशराज मोक्तान, बोर्ड निर्देशकहरू टंक भट्टराई, आशिषराज पन्त, राज पाण्डे तथा सुष्मा पौडेल रहेका छन् । ...